2026-yil 16-oktabr kuni Markazning 2026-yilga mo‘ljallangan ish rejasiga muvofiq hamda Mulk va bozor munosabatlari rivojlanishini tahlil qilish va modellashtirish ilmiy laboratoriyasi faoliyati doirasida Tadqiqotlar markazida navbatdagi ilmiy seminar bo‘lib o‘tdi.

Seminar kun tartibidan normativ-huquqiy tartibga solishni takomillashtirish va qonunchilikni qo‘llash amaliyotiga oid dolzarb masalalarga bag‘ishlangan ikkita ma’ruza o‘rin oldi:

• “Xorijiy mamlakatlarda davlat muassasalari faoliyatini tartibga solishga oid qonunchilik tahlili” — 2026-yil III choragi yakunlari bo‘yicha olib borilgan tadqiqot natijalari. Ma’ruzachi — Rustam Turgunovich Nuraliev.
• “Sud boshqaruvchisi tomonidan tugatish tartib-taomilini o‘tkazish rejasining asosiy qoidalari va uni rasmiylashtirish bo‘yicha uslubiy ko‘rsatmalar” — 2026-yil III choragi yakunlari bo‘yicha olib borilgan tadqiqot natijalari. Ma’ruzachi — Vadim Yuryevich Galkin.

Ilmiy muhokama davomida ishtirokchilar taqdim etilgan tadqiqot natijalarini ko‘rib chiqdilar, o‘rganilgan huquqiy mexanizmlarni qo‘llash masalalari yuzasidan fikr almashdilar hamda ishlab chiqilgan takliflar ustida keyingi ish yo‘nalishlarini muhokama qildilar.

Ma’ruzalar yuzasidan o‘z mulohazalari, savollari va takliflarini Markaz direktorining ilmiy ishlar va innovatsiyalar bo‘yicha o‘rinbosari, iqtisodiyot fanlari bo‘yicha falsafa doktori (PhD), professor Zufar Abdulloyevich Ashurov; bo‘lim mudiri, iqtisodiyot fanlari nomzodi Akmal Raximovich Valijonov; bo‘lim mudiri, iqtisodiyot fanlari doktori, professor Rustam Xusanovich Tashmatov; bo‘lim mudiri, iqtisodiyot fanlari nomzodi Rustam Turgunovich Nuraliev; katta ilmiy xodim, iqtisodiyot fanlari nomzodi Vadim Yuryevich Galkin hamda katta ilmiy xodim Tohirjon Amanovich Qodirov bildirdilar.

Bildirilgan mulohaza va tavsiyalar ko‘rib chiqilayotgan huquqiy tartibga solish mexanizmlarini takomillashtirish hamda ishlab chiqilgan takliflarning amaliyotda qo‘llanishini ta’minlashga qaratildi.

Seminar mulk va bozor munosabatlarini rivojlantirishning dolzarb yo‘nalishlari bo‘yicha Markaz tomonidan olib borilayotgan tadqiqotlar natijalarini birgalikda takomillashtirish va professional fikr almashish uchun muhim maydon bo‘lib xizmat qildi.