2026-yil 21-avgust kuni Toshkent shahrida O‘zLiDeP partiyasi va O‘zbekiston Rieltorlar palatasi tashabbusi bilan O‘zbekiston Respublikasining yangi “Rieltorlik faoliyati to‘g‘risida”gi O‘RQ-1163-son Qonuni bo‘yicha ochiq muhokama bo‘lib o‘tdi.

Tadbirda O‘zbekiston Respublikasi Oliy Majlisi Qonunchilik palatasi, O‘zbekiston Respublikasi Adliya vazirligi, O‘zbekiston Respublikasi Davlat aktivlarini boshqarish agentligi, Kadastr agentligi, O‘zbekiston Rieltorlar palatasi vakillari, shuningdek, rieltorlik tashkilotlari, bank sektori, notariat, qurilish va developerlash tashkilotlari rahbarlari va vakillari hamda ko‘chmas mulk bozorining boshqa ishtirokchilari qatnashdi.

Tadbirda O‘zbekiston Respublikasi Davlat aktivlarini boshqarish agentligi huzuridagi Xususiylashtirish va davlat aktivlarini boshqarish muammolarini tadqiq etish markazi nomidan Markaz direktori, iqtisod fanlari doktori, professor Butikov I.L., Markaz kichik ilmiy xodimi Mirzarahmonov F.S., Markaz yetakchi mutaxassisi, fizika-matematika fanlari nomzodi Butabayev M.Sh. hamda Markaz kotib-ish yurituvchisi Ikramov X. ishtirok etdi.

Muhokama asosan “savol-javob” shaklidagi ochiq muloqot formatida o‘tkazildi. Ishtirokchilar davlat organlari va professional hamjamiyat vakillariga yangi Qonunning mazmuni, unda nazarda tutilgan normalarni amalga oshirish tartibi hamda uning kuchga kirishiga tayyorgarlik bilan bog‘liq savollarni berish imkoniyatiga ega bo‘ldilar.

Tadbir doirasida Markaz kichik ilmiy xodimi Mirzarahmonov F.S. O‘zbekiston Respublikasi Davlat aktivlarini boshqarish agentligi vakillari bilan birgalikda muhokama ishtirokchilari oldida so‘zga chiqdi va berilgan savollarga javob berishda ishtirok etdi. Muhokamaning asosiy e’tibori rieltorlik faoliyatiga oid yangi qonunchilikning ayrim qoidalari, bozor ishtirokchilariga qo‘yiladigan talablar, malaka masalalari, Yagona reyestr, rieltor va ko‘chmas mulk agenti maqomi, shuningdek, yangi normalarni amaliyotda qo‘llashning amaliy jihatlariga qaratildi.