O‘zbekiston Respublikasi Hisob palatasi raisining birinchi o‘rinbosari, Buxoro viloyati bo‘yicha ishchi guruh rahbarining 2026-yil 11-avgustdagi 02-1565-son xatiga muvofiq, Markaz direktorining o‘rinbosari Z.A. Ashurov 2026-yil 19–22-avgust kunlari Buxoro viloyati iqtisodiyotining zaxiralari, resurslari va rivojlanish imkoniyatlarini o‘rganish, tizimli muammolarni aniqlash hamda aniq innovatsion g‘oyalar, taklif va tavsiyalar ishlab chiqish bo‘yicha respublika ishchi guruhi faoliyatida ishtirok etdi.

2026-yil 19-avgust kuni u Buxoro davlat texnika universitetida o‘tkazilgan “Buxoro — ilmiy tadqiqotlar maydoni” mavzusidagi ilmiy-amaliy konferensiyada ishtirok etdi. Konferensiyada hududning innovatsion rivojlanishi, iqtisodiyot tarmoqlaridagi tizimli muammolar, shuningdek, yalpi hududiy mahsulot, ishlab chiqarish quvvatlari, aholi bandligi, soliq bazasi va eksport hajmlarining o‘sishini ta’minlashga qodir loyihalarni tayyorlash bo‘yicha ilmiy-tadqiqot institutlarining vazifalari muhokama qilindi.

Tadbirlarda mamlakatning 51 ta ilmiy-tadqiqot instituti vakillari, shuningdek, Buxoro viloyatidagi korxonalar vakillari ham ishtirok etdi. Tashrif doirasida Z.A. Ashurov hududning ilg‘or korxonalari, jumladan, issiqxonalarda sabzavotlar, ekzotik mevalar va ko‘chatlar yetishtirish bilan shug‘ullanuvchi “Varnet” kompaniyasi, milliy kiyim-kechak va xalq amaliy san’ati buyumlarini ishlab chiqarishga ixtisoslashgan EZAZA Group kompaniyasi, shuningdek, “Poykent” turistik majmuasi faoliyati bilan tanishdi.

Buxoro viloyatidagi ishlar yakunlari bo‘yicha Z.A. Ashurov davlat aktivlaridan foydalanish samaradorligini oshirishning mavjud zaxira va imkoniyatlarini o‘rgandi hamda Buxoro viloyatida davlat aktivlaridan samarali foydalanish orqali qo‘shimcha zaxira, resurs va imkoniyatlarni ishga solish bo‘yicha uchta yo‘nalishda: davlat mulkini xususiylashtirish, davlat mulkini boshqarish va davlat ishtirokidagi korxonalarda korporativ boshqaruvni takomillashtirish bo‘yicha aniq takliflar ishlab chiqdi.

Xususiylashtirish sohasida savdolarga chiqarilgan 55 ta davlat aktivi tahlil qilindi, shu jumladan, bir yil va undan ortiq vaqt davomida sotilmagan 14 ta aktiv alohida o‘rganildi. Bunday obyektlar bo‘yicha “investitsion repozitsiyalash” mexanizmini joriy etish taklif qilindi. Mazkur mexanizm talab mavjud emasligining sabablarini qo‘shimcha tahlil qilish, har bir aktivdan keyingi foydalanishning eng istiqbolli variantlarini aniqlash, shu asosda investitsiya takliflarini shakllantirish va potensial investorlarni manzilli izlashni nazarda tutadi. Dastlabki hisob-kitoblarga ko‘ra, sotuvga chiqarilgan aktivlarni iqtisodiy muomalaga jalb etish qariyb 220 mlrd so‘m xususiy investitsiyalarni jalb qilish va 1 mingdan ortiq yangi ish o‘rinlarini yaratish imkonini berishi mumkin.

Davlat mulkini boshqarish sohasida inventarizatsiya jarayonida aniqlangan 287 ta bo‘sh turgan davlat ko‘chmas mulki obyektiga alohida e’tibor qaratildi. Faqat elektron savdolar orqali talab shakllanishini kutish o‘rniga “talab asosida ijaraga berish” mexanizmini joriy etish taklif qilindi. Mazkur mexanizm muayyan tumanlarda tadbirkorlarning bino va maydonlarga bo‘lgan ehtiyojini aniqlash, ushbu ehtiyojga mos bo‘sh davlat obyektlarini tanlash va keyinchalik ularni elektron savdolarga chiqarishni nazarda tutadi. Dastlabki hisob-kitoblarga ko‘ra, mazkur obyektlarni ijaraga jalb etish yiliga qariyb 3,65 mlrd so‘m qo‘shimcha ijara daromadini ta’minlashi, shu bilan birga tadbirkorlik faoliyati uchun yangi maydonlar yaratishi mumkin.

Korporativ boshqaruv sohasida davlat ishtirokidagi korxonalarni rivojlantirishni moliyalashtirish uchun kapital bozori salohiyatidan foydalanish taklif qilindi. Moliyaviy ko‘rsatkichlarning dastlabki tahlili asosida nisbatan barqaror natijalarga ega bo‘lgan beshta aksiyadorlik jamiyati aniqlandi. Ushbu jamiyatlar bo‘yicha qo‘shimcha aksiyalar chiqarish va/yoki korporativ obligatsiyalar emissiyasi orqali mablag‘ jalb qilish imkoniyatini o‘rganish taklif qilindi. Hisob-kitoblarning bazaviy ssenariysiga ko‘ra, kapital bozori vositalari orqali qariyb 25 mlrd so‘m qo‘shimcha investitsiya resurslarini jalb qilish imkoniyati mavjud bo‘lib, ushbu mablag‘lar modernizatsiya, ishlab chiqarish quvvatlarini kengaytirish va yangi investitsiya loyihalarini amalga oshirishga yo‘naltirilishi mumkin.

Markaz tomonidan ishlab chiqilgan takliflar nafaqat davlat aktivlarini boshqarish samaradorligini oshirishga, balki mavjud davlat aktivlarini Buxoro viloyatida xususiy investitsiyalar, tadbirkorlik faolligi, yangi ish o‘rinlari va daromadlarning qo‘shimcha manbalariga aylantirishga qaratilgan. Takliflar va ularga muvofiq tayyorlangan dastlabki hisob-kitoblar ko‘rib chiqish uchun respublika ishchi guruhiga taqdim etildi.